Upepo wa kijijini ulikuwa wa baridi kali, ukileta harufu ya uozo na madawa ya kiganga. Pale chini ya mbuyu, Juma alikuwa amepoteza utu wake. Alikuwa akitafuna nyasi na udongo, huku minyororo ya chuma iliyopata kutu ikimng'ata shingoni na mikononi. Kila akijaribu kunyanyuka, ile minyororo ilikuwa inatoa sauti ya kicheko cha ajabu.

"Mwanangu... nisaidie... njaa..." Juma alitoa sauti ya kinyama, akinitazama kwa macho yale meupe yasiyokuwa na mboni.

Mzee Kalumanzila alicheka kicheko kikavu. Alishuka juu ya lile jiwe, akichechemea. "Mnataka kumchukua msukule wangu? Huyu ni mtumwa wangu sasa. Atafanya kazi kwenye mashamba yangu ya siri mpaka mifupa yake iishe. Hiyo ndiyo gharama ya magari na majumba niliyompa mkoa Y!"

"Ulimdanganya!" Nilipiga kelele, nikisogea mbele kwa hasira. "Ulijua masharti yale yangevunjika tu! Ulitega mtego ili umchukue awe mtumwa wako!"

Mganga alinitolea macho makali, na ghafla nilihisi miguu yangu imenaswa na ardhi. Nilishindwa kupiga hatua hata moja. "Kijana, duniani hakuna chakula cha bure. Alitaka haraka, nikampa haraka. Alitaka sifa, nikampa sifa. Sasa ni zamu yangu kupata sifa ya kuwa na msukule mwenye nguvu kama yeye."

Neema alinisogelea na kunishika begani. Alikuwa ametulia, lakini mikono yake ilikuwa na joto la ajabu. "Mzee Kalumanzila," Neema aliita kwa sauti thabiti, "Deni la damu limelipwa na ule mwanga wa haki. Juma siyo wako tena. Fungua minyororo hiyo kabla giza halijakumeza wewe mwenyewe."

Mzee Kalumanzila alifyatua mate chini kwa dharau. "Wewe binti, ule mwanga wako uliishia kule jalalani. Huku ni kwangu, huku mizimu inaniitikia mimi!"

Alinyanyua fimbo yake juu na kuanza kuimba lugha ya ajabu. Ghafla, Juma alianza kubadilika. Misuli yake ilivimba, kucha zikawa ndefu kama za simba, na akaanza kutoa ngurumo ya kutisha. Alielekezwa kutushambulia sisi!

"Muue! Rarua nyama zao!" Mganga aliamuru.

Juma aliruka hewani akituelekea kwa kasi ya ajabu. Nilikifunga macho nikijua huu ndio mwisho wetu. Lakini ghafla, nilisikia sauti ya kitu kikipasuka. *KRAAAK!*

Nilifumbua macho na kuona Neema amesimama mbele yangu, ameshika Biblia ndogo ya zamani ambayo sikutajua aliitoa wapi. Haikuwa mwanga wa radi safari hii; ilikuwa ni sauti ya utulivu iliyotoka kinywani mwake. Neema alianza kusoma maneno ya ukombozi.

Kila neno alilolitamka Neema, lile shingo la Juma lilikuwa linatoa moshi mweusi. Juma alianguka chini akigaagaa kwa maumivu, huku ile minyororo ikianza kulegea yenyewe.

"Acha! Unaharibu kazi yangu!" Mzee Kalumanzila alipiga kelele, akijaribu kurusha unga mwekundu kuelekea kwa Neema.

Lakini ule unga ulirudi kwake mwenyewe kana kwamba kuna ukuta usioonekana. Mganga alianza kuwaka moto kuanzia miguuni. Moto ule haukuwa na moshi, ulikuwa unateketeza ngozi yake polepole huku akipiga mayowe ya kutisha.

"Juma! Amka! Jitambue!" Nilimkimbilia rafiki yangu na kumshika kichwa.

Macho ya Juma yalianza kurudi kwenye hali ya kawaida. Alinitazama, kisha akamtazama Neema, na mwisho akamtazama yule mganga aliyekuwa akiteketea. "Mwanangu... nisamehe. Tamaa imenifikisha hapa."

Mnyororo wa mwisho ulikatika kwa kishindo. Mzee Kalumanzila alitokomea na kuwa jivu jeusi, na lile eneo la mbuyu likaanza kutaharuki. Miti ilianza kuanguka na ardhi kupasuka.

"Kimbieni! Roho za waliouawa na huyu mganga zinakuja kuchukua kisasi!" Juma alipiga kelele akituvuta mikono.

Tulikimbia kuelekea kijijini, lakini huku nyuma tuliona maelfu ya vivuli vikitoka ardhini vikiungana na upepo wa kimbunga. Kijiji kizima kikaanza kuzingirwa na giza nene mchana kweupe.

Tulipofika barabara kuu ya vumbi, gari moja la zamani lilikuwa limepaki. Dereva wake alikuwa ni yule mzee tuliyemkuta kijijini mwanzo. "Ingieni haraka! Laana ya Kalumanzila imevunjika, lakini gharama yake ni kubwa!"

Tuliingia ndani na gari likaondoka kwa kasi. Juma alikuwa akitetemeka, mwili wake ukiwa na makovu ya kuteswa. Alitazama mikono yake; alikuwa hana kitu, hana pesa, hana magari, hana hata viatu. Alikuwa yule yule Juma dereva wa Taxi wa miaka mitatu iliyopita.

"Mwanangu," Juma alinisogelea na kuninong'oneza, "Nimerudi... lakini kuna kitu mganga amekiacha ndani yangu. Kila nikifunga macho, naona sura za wale watu waliokufa kwenye Fuso zangu. Wananifuata, mwanangu... hawajaniacha."

Hapo ndipo nilipoelewa; minyororo ya chuma imekatika, lakini minyororo ya nafsi bado ilikuwa imemfunga Juma. Je, toba ya kweli itatosha kumfuta damu mikononi mwake?

**Usikose Sehemu ya 11...**