Usingizi wa usiku ule ulikuwa wa machafuko kidogo. Nilijikuta nawaza mambo mengi; kuanzia kufukuzwa kwa kaka, wifi mjeuri, mpaka huyu Sam aliyenitokea kama muujiza katikati ya kiza cha Dodoma. Niliamka asubuhi na mapema, saa kumi na mbili kamili, nikajiandaa kwa ajili ya interview yangu iliyokuwa ifanyike saa mbili asubuhi.

Nikiwa bado nimejifunga taulo baada ya kuoga, nilisikia hodi mlangoni. Moyo ulinidunda. Niliuliza ni nani, na sauti ya upole ya Sam ilinijibu.

"Tedy, nimekuletea chai hapa nje, fungua nikupe ule upate nguvu ya interview."

Nilifungua mlango kidogo na kuchungulia. Sam alikuwa ameshapendeza na suti yake ya bluu iliyomkaa sawasawa, mkononi ameshika tray yenye chai, mkate, na mayai. Alinitazama na kutabasamu, kisha akaweka tray ile mezani.

"Kula haraka Tedy, nimeongea na dereva wa kampuni atatuchukua hapa saa moja na nusu kukuwahi ofisini," aliniambia huku akiondoka kurudi chumbani kwake kunipa nafasi ya kujiandaa.

Sikupoteza muda. Nilikula haraka, nikavaa nguo zangu za kiofisi ambazo nilizipiga pasi usiku ule kwa msaada wa wahudumu wa hoteli. Nilitoka nje nikamkuta Sam ananisubiri mapokezi. Tulipanda gari la kifahari la kampuni yake (Toyota Prado) kuelekea eneo la interview.

Tulipofika mbele ya jengo kubwa la kioo, Sam alishuka na kunifungulia mlango. "Hapa ndipo unapopaswa kuonyesha ulimwengu kuwa wewe ni bora, Tedy. Nitakusubiri hapa nje mpaka umalize."

"Hapana Sam, usijisumbue, nenda kwenye kazi zako nitatafuta usafiri nikimaliza," nilimkatalia kwa aibu, nikihisi namchosha sana.

Alinitazama kwa macho yenye mamlaka na upendo kwa mbali. "Tedy, nimeshasema nitakusubiri. Nenda kafanye kweli."

Niliingia ndani ya jengo lile nikiwa na ujasiri mkubwa. Interview ilikuwa ngumu, maswali yalikuwa ya mtego, lakini kila nilipohisi kukwama, nilikumbuka maneno ya Sam na lile tabasamu lake, nikajikuta najibu kwa kujiamini. Baada ya saa mbili, nilitoka nje nikiwa na tabasamu pana.

Nilimkuta Sam amesimama karibu na gari akichat kwenye simu yake. Aliponiona, alitabasamu na kunifuata. "Vipi, mambo yameendaje?"

"Sam, naona kama nimepata! Maswali yote nimeyajibu vizuri sana," nilimjibu kwa furaha huku nikimrukia na kumkumbatia bila kujijua.

Alinikumbatia pia, kisha akaniambia jambo lililonishtua. "Safi sana Tedy. Sasa, kwakuwa umeshamaliza interview, na mimi kazi zangu hapa Dodoma zimeisha, nimepanga turudi Dar es Salaam leo mchana. Lakini kabla ya hapo, nataka nikupeleke sehemu moja tukasherehekee ushindi wako."

Alinipeleka kwenye mgahawa mmoja mzuri sana uliopo mlimani. Tulipokuwa tunakula, Sam alianza kuwa muwazi zaidi. "Tedy, tangu nimekuona ndani ya basi la Shabiby, nilihisi kitu tofauti. Sijui ni nini, lakini sitaki kukupoteza. Je, utakuwa tayari kuendelea na safari hii ya maisha na mimi?"

Nilishusha pumzi ndefu. Sikuwa na uhakika kama ni mapenzi au ni shukrani kwa msaada wake. Kabla sijamjibu, simu ya Sam iliita. Aliitazama kisha uso wake ukabadilika na kuwa na huzuni au wasiwasi.

"Samahani Tedy, ngoja nipokee hii simu ya ofisini," alisema na kusogea mbali kidogo.

Aliporudi, uso wake ulikuwa umekunjamana. "Tedy, kuna tatizo limetokea ofisini Dar. Inabidi tuondoke sasa hivi. Na kuna kitu kuhusu hiyo kampuni uliyofanya interview leo... inabidi nikwambie ukweli ambao nilikuwa nakuficha."

Moyo ulinishuka. "Ukweli gani Sam?"

Sam alinitazama kwa huzuni na kusema, "Ile kampuni uliyofanya interview... mmiliki wake ni mimi, Sam. Na mimi ndiye nitakayetoa maamuzi ya mwisho kama unapata kazi au hupati."

Nilibaki mdomo wazi. "Nini? Kwahiyo wewe ndiye **Boss**?"

---
**Inaendelea Sehemu ya 4...**