Safari ya kuelekea kijijini kwa akina Kelvin ilianza Ijumaa asubuhi. Kelvin alikuja kunichukua na lile gari lake la kifahari, safari hii akiwa amevalia kishkaji—jeans na t-shirt ya *polo*. Mimi nilijilipua vilivyo; nilivaa gauni refu la heshima lakini linalochora umbo langu vizuri, nikajipaka marashi yanayonukia utajiri.

"Tasha, kumbuka makubaliano yetu," Kelvin alisema huku akikatiza mitaa ya jiji kuelekea barabara kuu. "Mbele ya mama na ndugu zangu, sisi ni wapenzi wa dhati. Tunapendana sana, na tuna mpango wa kufunga ndoa hivi karibuni."

"Usijali Kelvin, mimi ni muigizaji mzuri. Milioni mbili siyo mchezo," nilimjibu huku nikicheka, ingawa ndani ya moyo wangu kulikuwa na kauoga fulani.

Tulipofika kwenye lile lango kubwa la nyumba ya wazazi wake, nilishangaa. Haikuwa nyumba ya kijijini kama nilivyodhani, bali ilikuwa ni jumba la kifahari (mansion) lililozungukwa na bustani nzuri ya maua na miti ya matunda.

Mwanamke mmoja wa makamo, aliyekuwa amevaa kilemba na ushanga wa kimasai shingoni, alitoka mbio kutulaki. "Mwanangu Kelvin! Karibu sana!" alimkumbatia mwanae kwa furaha, kisha macho yake yakatua kwangu.

"Huyu ndiye Tasha niliyekuambia mama," Kelvin alinitambulisha huku akiniwekea mkono begani.

"Karibu sana mwanangu Tasha! Karibu kwenye familia!" Mama Kelvin alinichangamkia kwa bashasha, akanikumbatia kwa nguvu kiasi kwamba nilihisi kama mimi ni mkwe wake wa kweli. Nilihisi vibaya kidogo moyoni mwangu; nilijua tunamdanganya mama huyu mkarimu.

Tulipoingia ndani, harufu ya pilau na nyama ya choma ilikuwa ikisambaa kote. Ndugu wengine, wadogo zake Kelvin na shangazi mmoja, walikuwa wamejaa sebuleni. Kila mmoja alikuwa akinitazama kwa tabasamu la matumaini.

Baada ya chakula cha jioni na mazungumzo marefu ya kifamilia, saa za kulala zilifika. Hapo ndipo mtihani wa kwanza ulipoanza.

"Tasha mwanangu, chumba chenu kiko ghorofani, ni kile cha kulia," Mama Kelvin alisema huku akitabasamu.

Nilishtuka. Nilimtazama Kelvin kwa jicho la "tumeingia chaka". "Chumba chenu?" niliwaza. Kelvin alijaribu kukohoa ili kurekebisha hali ya hewa.

"Mama, unajua Tasha ni mgeni, labda angependa chumba chake peke yake..." Kelvin alijaribu kusema kwa sauti ya upole.

Mama yake alicheka kwa nguvu. "Wewe Kelvin acha utani! Nyie si ni wachumba mnataka kuoana? Tena mmetoka mjini pamoja! Hapa nyumbani kwangu hamna mambo ya vyumba tofauti kwa watu wanaopendana. Nimeshaandaa kila kitu, nendeni mkapumzike."

Tulipanda ngazi kwa unyonge, tukiwa tumefuatana kama watoto wanaopelekwa kwa mwalimu mkuu. Tulipoingia ndani ya kile chumba, mlango ulipofungwa tu, nilimgeukia Kelvin kwa hasira ya chini chini.

"Kelvin! Huku ndiko ulisema nitakuwa na chumba changu?" nilinong'ona huku nikiwa nimepaniki.

"Tasha, samahani... nilisahau kuwa mama yangu ana msimamo mkali kuhusu mambo ya familia. Akiona tunatengana vyumba, atajua tu kuwa kuna kitu hakiko sawa," Kelvin alijitetea huku akivua viatu vyake.

Chumba kilikuwa na kitanda kimoja kikubwa cha mbao (King Size), chenye shuka nyeupe zilizopigwa pasi vizuri. Nilikitazama kile kitanda, kisha nikamkumbuka Kelvin na kile "dude" lake la gesti.

"Sikiliza Kelvin," nilisema huku nikimnyooshea kidole. "Tunalala kitanda kimoja, sawa. Lakini wewe utakaa upande huo, na mimi huu. Na usijaribu hata kunigusa! Kumbuka mimi ni muigizaji tu hapa."

"Haina shida Tasha, mimi mwenyewe nimechoka na safari. Nitajifungika na blanketi langu," Kelvin alijibu kwa upole na kwenda bafuni kubadilisha nguo.

Nikiwa nimejilaza upande wangu, nilihisi harufu ya marashi ya Kelvin kwenye mto. Muda mfupi baadae, Kelvin alitoka bafuni akiwa amevaa bukta ya kulalia (boxer) na t-shirt nyepesi. Alizima taa kubwa na kuwasha taa ndogo ya kando ya kitanda (bedside lamp).

Alipopanda kitandani na kugeuka upande wa pili, nilihisi joto la mwili wake. Chumba kilikuwa kimya sana, kiasi kwamba niliweza kusikia mapigo yake ya moyo. Ghafla, hofu ilitoweka na kuanza kubadilika kuwa udadisi wa ajabu.

Niliwaza: *Hivi huyu mwanamume mstaarabu na tajiri hivi, anawezaje kuwa na "mzigo" ule wa kutisha? Na kwanini moyo wangu unadunda hivi kila anapogeuka?*