Anifa alibaki ameketi kwenye ngazi za nje ya nyumba ile ambayo zamani aliiita "kasri lake la upendo." Harufu ya pilau iliyokuwa ikipikwa na Ashura ndani ilimkumbusha mbali—ilimkumbusha siku Hassan alipomshangaza na keki akitokea kazini, siku ambayo yeye aliipiga teke kwa dharau.

Baada ya saa mbili za kusubiri kwenye jua kali la mchana, gari la kijani la daktari liliingia kwenye geti. Alikuwa ni Hassan. Alishuka akiwa amevaa miwani ya jua na suti yake ya kikazi, akionekana mtanashati na mwenye afya kuliko wakati Anifa anamwacha.

Anifa alijitupa miguuni mwa Hassan mara tu alipomkaribia. "Hassan! Mume wangu mpendwa, nisamehe! Nilikosea, nimeghiribiwa na marafiki wabaya. Mzee Mvule amenifukuza kama mbwa, sina pa kwenda Hassan!"

Hassan alisimama imara. Hakumshika wala kumuinua. Alimtazama kwa huzuni iliyochanganyika na mshangao. "Anifa? Umerudi kufanya nini hapa? Siku ile ulisema mimi nanuka umaskini, sasa hivi harufu hiyo imekuwa manukato kwako?"

"Hassan, naomba nikupe maelezo..." Anifa alilia kwa sauti ya kwikwi.

"Huna haja ya kutoa maelezo," Hassan alikatiza kwa sauti ya utulivu iliyomchoma Anifa kuliko matusi. "Siku ile ulipoondoka na Bi Husna, uliua kila kitu ndani yangu. Uliua upendo, uliua heshima, na uliua tumaini. Huyu mwanamke uliyemkuta ndani, Ashura, ndiye aliyekusanya vipande vya moyo wangu ulivyovivunja. Yeye ndiye mke wangu sasa."

Ashura alitokea mlangoni na kumuwekea Hassan mkono begani. "Mume wangu, karibu ndani. Chakula kiko tayari."

Hassan alimtazama Ashura kwa tabasamu la dhati, kisha akamgeukia Anifa. "Anifa, chukua mabegi yako. Nenda kwa marafiki zako waliofanya uone mimi sifai. Mimi nimeshakusamehe, lakini mlango wa maisha yangu umefungwa kwako milele."

Hassan aliingia ndani na Ashura, na mlango ukafungwa kwa mara ya pili. Anifa alibaki amesimama peke yake, mabegi yake ya bei mbaya yakiwa yamezagaa sakafuni. Alihisi maumivu makali kifuani. Alijaribu kuwapigia simu Bi Husna na Bi Zuhura kwa mara ya mwisho, lakini simu zake zilikuwa zimezuiliwa (blocked).

Akiwa hana pa kwenda, alikumbuka kuwa ana mama yake hospitalini. Aliamua kubeba mabegi yake na kuanza kutembea kwa miguu kuelekea hospitali, akitumaini kuwa angalau mama yake angemsikiliza. Lakini alipofika hospitalini, alikutana na habari nyingine ya kushtua.

"Mama yako amesharuhusiwa wiki iliyopita," nesi mmoja alimwambia kwa dharau. "Daktari Hassan alimlipia madeni yote na kumpeleka kijijini kwa ndugu zake kwa sababu alisema hapa mjini hana mtu wa kumtunza baada ya binti yake kukimbia na matajiri."

Anifa alidondoka chini kwenye korido ya hospitali. Alikuwa amepoteza kila kitu: Mume, Nyumba, Marafiki, na sasa hata Mama yake. Alijiona ni msaliti mkuu wa maisha yake mwenyewe.

---
**Je, Anifa atafunga safari ya kwenda kijijini kumuomba mama yake msamaha? Na nini kitatokea atakapokutana na Bi Husna mtaani akiwa na mwanaume mwingine? Usikose Sehemu ya 12.**