Sauti ya breki za gari nje ilikuwa kama mlio wa saa ya kifo. Frank alikuwa ametulia tuli, macho yake yakimtazama Zuwena ambaye alikuwa akijaribu kuficha tabasamu la ushindi nyuma ya glasi yake ya divai.

Zuwena alisimama haraka, akijifanya anaenda jikoni kuchukua sahani. "Frank mume wangu, mbona unaniangalia hivyo leo? Unaonekana kama mtu unayefikiria mambo mazito sana."

Frank alitabasamu, lakini tabasamu lile halikufika kwenye macho yake. "Nawaza tu, Zuwena. Nawaza jinsi binadamu anavyoweza kuwa na nyuso mbili. Uso mmoja wa busu, na uso mwingine wa risasi."

Zuwena aliganda papo hapo. Kabla hajajibu, mlango wa sebuleni ulifunguliwa kwa kishindo kikubwa zaidi ya cha jana. Beda na vijana wake wawili waliingia, safari hii wakiwa hawajajifunika nyuso zao. Walikuwa na uhakika kuwa Frank hatabaki hai kutoa ushahidi.

"Safari hii hatuchezi michezo ya watoto!" Beda alifoka huku akimnyooshea Frank bunduki ya kweli. "Frank, simama! Na wewe mrembo, sogea pembeni kwanza."

Zuwena alijifanya kupiga kelele ya hofu na kukimbilia kona ya chumba, lakini macho yake yalikuwa yakimtazama Beda kwa ishara ya "mmalize haraka".

Frank hakutetemeka. Alibaki ameketi, akishika glasi yake ya divai. "Beda... au nikuite 'Fundi Maji'? Karibu kwenye karamu yangu ya mwisho."

Beda alishtuka kusikia jina lake la siri. "Unajua jina langu? Haina shida, wafu hawana kumbukumbu. Zuwena, leta zile hati za viwanja ulizochukua asubuhi, kisha tummalize huyu mjinga."

Frank alicheka kwa sauti ya kukata tamaa. "Zuwena, kumbe hati ulishazichukua? Mapenzi ya kweli yamegeuka kuwa biashara ya damu. Lakini nina swali moja kwako Beda... Je, unamuamini huyu mwanamke?"

Beda alikunja uso. "Unamaanisha nini?"

"Kama ameweza kunisaliti mimi niliyempa kila kitu kwa miaka mitano, unadhani wewe atakupa nini baada ya kupata hizi pesa? Unadhani wewe ni wa pekee?" Frank alisema huku akitoa rimoti ndogo mfukoni mwake.

Zuwena alipiga kelele, "Beda, usimsikilize! Anajaribu kukuchanganya! Mpige risasi sasa hivi!"

Beda alinyoosha kidole kwenye *trigger*, lakini kabla hajafinya, taa zote za nyumba zilizima ghafla. Giza nene lilitanda. Ndani ya sekunde hiyo hiyo, sauti ya ving'ora vya polisi ilisikika kwa mbali, ikikaribia kwa kasi ya ajabu.

"Umechelewa, Beda," sauti ya Frank ilisikika gizani, ikitokea upande mwingine wa chumba. "Nyumba hii imezingirwa. Na kila neno mliloongea tangu mmeingia hapa, limerekodiwa na liko 'live' kituo cha polisi."

Beda alipaniki. "Zuwena! Ulisema hajui kitu! Ulisema ni mjinga!"

"Sijui! Sielewi imekuwaje!" Zuwena alipiga kelele kwa hofu ya kweli safari hii.

Ghafla, mwanga mkali wa tochi za polisi ulipiga kupitia madirishani. Frank alikuwa amepanga mtego huu kwa ushirikiano na yule mpelelezi na jeshi la polisi. Lakini ndani ya vurugu hizo za giza, Zuwena alifanya kitu ambacho hakuna mtu alitegemea. Alimvamia Beda na kujaribu kumnyang'anya bunduki.

"Nipe bunduki! Kama polisi wapo hapa, siendi gerezani peke mimi!" Zuwena alifoka kwa sauti ya kichaa.

Risasi moja ilifyatuka gizani. **"BANG!"**

Kila mtu aliganda. Utulivu wa kutisha ulitawala kwa sekunde chache kabla ya polisi kuvunja mlango na kuingia ndani na taa zao kubwa.

---
**Je, risasi ile imempata nani? Frank, Beda, au msaliti Zuwena? Na je, huu ndio mwisho wa "Hamu ya Usaliti"? Usikose Sehemu ya 8.**